Markaziy saylov komissiyasining Raisi Zayniddin Nizamxodjayev komissiya aʼzolari X.Mamatov, B.Yunusov, S.Kurbankulovlar 2-iyun kuni Jizzax, Sirdaryo, Toshkent viloyatlari hamda Toshkent shahrida bo‘lib, “Muddatidan ilgari O‘zbekiston Respublikasi Prezidenti saylovini o‘tkazuvchi komissiyalar aʼzolarining malakasini oshirishni tashkil etish Konsepsiyasi” asosida olib borilayotgan o‘quv-mashg‘ulotlari jarayoni bilan tanishdilar.
Markaziy saylov komissiyasi Raisi o‘quv-mashg‘ulot ishtirokchilari bilan bo‘lgan muloqot chog‘ida muddatidan ilgari o‘tkaziladigan O‘zbekiston Respublikasi Prezidenti saylovini yuqori saviyada tashkil etish, umumeʼtirof etilgan xalqaro tamoyillar, ilg‘or milliy va xorijiy tajriba asosida o‘tkazishda mazkur o‘quvlarning ahamiyatiga to‘xtalib, bo‘lib o‘tgan saylov va referendum jarayonlarida uchastka komissiyalari faoliyatida yo‘l qo‘yilgan xato-kamchiliklarga barham berish, o‘quv materiallarini puxta o‘zlashtirish va faoliyatda saylov qonunchiligi talablarini og‘ishma bajarish yuzasidan o‘z fikr mulohazalarini bildirib o‘tdi.
Qayd etilganidek, uchastka saylov komissiyalarning qonuniylik, xolislik, adolatlilik, haqqoniylik va oshkoralik tamoyillariga qatʼiy amal qilgan holda faoliyat ko‘rsatishlari muddatidan ilgari o‘tkaziladigan O‘zbekiston Respublikasi Prezidenti saylovining muhim mezonlari hisoblanadi.
2–13-iyun kunlari butun respublikamiz hududlari bo‘ylab o‘tkaziladigan o‘quv-mashg‘ulotlarida 944 nafar hududiy trenerlar tuman va shaharlarga taqsimlanib, uchastka komissiyasi raisi, rais o‘rinbosari va kotibligiga 33 mingga yaqin nomzodlar uchun mashg‘ulotlar o‘tkazadilar.
O‘quvlar konsepsiyaga muvofiq, 18-24 nafar tinglovchidan iborat shakllantirilgan guruhlar kesimida interaktiv usullarda tashkil etilib, ishtirokchilar bilan muloqot, saylov jarayonlarini modellashtirish, o‘zaro fikr va tajriba almashish tarzida o‘tkazilishi yo‘lga qo‘yilgan. Har bir mavzu bo‘yicha savol-javoblar, test sinovlari orqali tinglovchilarning bilimlar mustahkamlanmoqda. Shu bilan bir qatorda, har bir mavzu bo‘yicha Markaziy saylov komissiyasi tomonidan tayyorlangan video roliklar o‘quv jarayonida namoyish etilmoqda.
