Markaziy saylov komissiyasi Raisi Zayniddin Nizamxodjayev hamda Markaziy saylov komissiyasi a’zosi Xalmuxammed Paluaniyazov Toshkent shahrining Shayxontoxur hamda Chilonzor tumanlarida bo‘lib, O‘zbekiston Respublikasi Oliy Majlis Qonunchilik palatasi, xalq deputatlari viloyat va shahar Kengashlari deputatlarining saylovlarini o‘tkazuvchi uchastka saylov komissiyalari a’zoligiga nomzodlarning saylovga tayyorgarlik ko‘rish va uni o‘tkazishga doir o‘quv-amaliyot mashg‘ulotlari hamda tuman uchastka saylov komissiyalarining saylovga tayyorgarlik ko‘rish jarayonlari bilan yaqindan tanishdi.
O‘rganishlar avvalida MSK Raisi Davlat boshqaruv akademiyasida bo‘lib Respublikamiz bo‘ylab o‘tkazilayotgan o‘quv-amaliy mashg‘ulotlarni real rejim asosida onlayn kuzatish imkonini beruvchi monitoring qilish markazidan turib o‘quvlarning borishini kuzatdi.
Shundan so‘ng, MSK Raisi Shayxontoxur tumanida tashkil etilgan o‘quv-amaliy mashg‘ulot jarayonlari bilan tanishdi. Tinglovchilar bilan bo‘lgan muloqot chog‘ida mazkur o‘quv mashg‘ulotlari saylovlarga tayyorgarlik ko‘rish va uni o‘tkazishni yuqori saviyada tashkil etish, shu bilan bir qatorda saylov qonunchiligidagi o‘zgarishlar mohiyatini anglab yetish va mavjud talablarni to‘laqonli bajarishda muhim ahamiyat kasb etishi qayd etib o‘tildi.
O‘rganishlar Chilonzor tumanida davom ettirildi va bu yerda tuman saylov komissiyasi binosida bo‘lib komissiya a’zolari uchun yaratilgan shart-sharoitlar bilan yaqindan tanishildi. Suhbatlar davomida saylovga tayyorgarlik ko‘rish borasida amalga oshirilayotgan chora-tadbirlar yuzasidan tegishli ko‘rsatma va tavsiyalar berib o‘tildi.
