2023-yil 5-noyabr kuni Moldova Respublikasida umumiy mahalliy saylovlar bo‘lib o‘tdi, unda mahalliy kengashlar rahbarlari va a’zolari, shuningdek, shahar va qishloqlar hokimlari saylandi.
O‘zbekiston Respublikasi Markaziy saylov komissiyasi Raisi Z.Nizamxodjayev boshchiligidagi delegatsiya vakillari saylov jarayonlarini kuzatishda ishtirok etdi. Delegatsiya a’zolari Moldovaning turli mintaqalaridagi qator saylov uchastkalarida, jumladan, poytaxt Kishinyov va Shtefan Vode okrug saylov kengashida bo‘ldi.
O‘zbekiston Markaziy saylov komissiyasi vakillari Moldovada saylovga tayyorgarlik ko‘rish va uni o‘tkazish jarayonini xalqaro standartlarga mos deb baholadi. Delegatsiya a’zolari saylov uchastkalari ishini tashkil etish samaradorligi, xodimlarning kasbiy mahorati, shuningdek, xotin-qizlar va yoshlarning saylovdagi faol ishtirokini e’tirof etishdi. Fuqarolarning barcha toifalari, jumladan, nogironligi bo‘lgan shaxslar uchun ham ovoz berish imkoniyatini ta’minlash chora-tadbirlariga alohida e’tibor qaratildi.
O‘zbekiston vakillari saylov uchastkalaridan birida va okrug saylov kengashida ham ovozlarni sanab chiqish jarayonini kuzatdilar.
Delegatsiya saylov natijalari Moldova xalqining xohish-irodasini aks ettirishiga ishonch bildirdi.
O‘zbekiston Markaziy saylov komissiyasi delegatsiyasi tashrifni yakunlar ekan, bunday xalqaro kuzatuvlar har ikki mamlakatda saylovni rivojlantirishda hamda demokratik institutlar va jarayonlarni mustahkamlashda muhim ahamiyat kasb etishini ta’kidladi. Ushbu tashrif O‘zbekiston va Moldova o‘rtasidagi saylov huquqi sohasida hamkorlik va sheriklikni kengaytirish yo‘lidagi navbatdagi qadam bo‘ldi.
Markaziy saylov komissiyasi
